(المشهد الرابع عشر)&(المشهد الخامس عشر)

ليل – داخلى (منزل حسن)

(سمير) يجلس مع (حسن) وهو يبكى بينما يحاول تهدئته قائلاً:
-يا أخى ماتعملش في نفسك كده..!! أنت راجل وبرضوا هوا مهما كان أبوك ومافيهاش حاجه لو ضربك..؟!
(سمير) في تأثر:
أنا مش زعلان من كده..أنا خايف من الفضايح إللى ممكن يعملها لسحر في البيت..ويعقد الموضوع أكتر من المصايب إللى فيه..!!
(حسن) يربت على كتفيه مطمئناً:
-ماتبقاش متشائم قوى..!! خليك عندى الليلة..وبعدين بكره هتلاقى الجو راق وأبوك نسى الموضوع..وكل حاجه بقت تمام..!! ياله قوم يا سمير بينا ننام.
نظر إليه (سمير) في ذهول:
-ننام..؟!! يجينى منين النوم..؟! يعنى ياربى كان أيه لزمة العذاب ده كله..؟! كفايه لحد كده..!! حرااام..!!
قاطعه(حسن) قائلاً:
-يأخى استغفر الله..!! وماتقولش الكلام ده..؟! بكره إن شاء الله تنصلح الأحوال..؟! تبات نار تصبح رماد..!!

المشهد الخامس عشر

نهار – داخلى (شقة سمير)
..عاد (سمير) إلى منزله في اليوم التالي, فوجد كل شئ هادئ - كأن شيئأ لم يكن..!!- دلف إلى الشقة خلسة وبعدما تأكد من عدم وجود والدة؛ أخذ يفتش عن والدته حتى وجدها في المطبخ فبادرها قائلاً:
-صباح الخير يا ماما..
أجابته أمه في لهفة:
-سمير..!! صباح النور أزيك يا حبيبى ..بقى كده يا سمير تبات بره وتخلينى أقلق عليك..؟!
أشاح بوجهه عنها وقال في حزن:
-أنا كنت عند حسن صاحبى..!!وبعدين يرضيكى إللى حصل امبارح..؟!هوا أنا لسه صغير علشان يضربنى بالقلم..؟!
ربتت الأم على كتفه قائلة:
-ما تزعلش منه ..؟! دا مهماً كان أبوك..!!ويعنى هوا قصده أيه إلا مصلحتك..؟!
قاطعها في غضب:
مصلحتى..!! ليه هوا أنا كنت عملت أيه..؟! وبعدين أنا عارف مصلحتى كويس..!!والحمد لله بأنجح كل سنه بتفوق..؟!
قالت الأم محاولة تهدئته:
-برضوا هوا يعرف أكتر منك..؟! ومش عاوز حاجه تشغلك دلوقتى..أنت لسه صغير..!!وبكره لما تكبر وتخلّف هتعرف الأب بيحب أبنه أزاى..؟!
قاطعها ثانية:
-حب..!! وهوا إللى يحب واحد يخنقه..؟! أنا ماعدتش صغير..وبقيت مسئول عن نفسى..وكلها سنتين وأتخرج..؟!وبعدين يكون في علمك أنا وسحر بنحب بعض..!!ومافيش قوة على الأرض هتقدر تفرق بينا..؟!ومش هتنازل عنها أبداً..!!
فجأة فُتَح باب الشقة ودخل (مرسى أفندى) متجهماً وقال ساخراً:
-والله وكبرت..!! وبقالك صوت جايب لأخر الشارع وعاملى فيها راجل..!!طيب يا فالح أبقى ورينى هتصرف على نفسك منين لحد ما تأخد شهادتك..؟! ولا عما يبقى يجيى عليك الدور وتتوظف..؟!وقدامك بعدها قول خمس ست سنين على ما تلقى شقة ولا تحوش تمن المهر والشبكة..؟! تفتكر الغندورة بتاعتك هتستناك العمر كله..؟! طبعاً لما مش هتلقى منك رجى مش هتضيع وقتها معاك وهتشوف لها واحد جاهز من مجاميعه..!! أنت يا بابا شوخشيخة بتلعب بها الأمورة لحد مايجيلها صاحب نصيبها..!! معقول هيا هتسيب واحد دكتور قد الدنيا معاه عربية تمساحه بيضا تسد عين الشمس وشئ وشويات في البنك وتستنى واحد تلموذ زيك..؟!
أجابه (سمير) في إصرار:
-أيوه هتسيب كل ده..!! هيا قالتلى أنها رفضته وهتستنانى..لأننا بنحب بعض ومتفقين على كل حاجة..!! هنتجوز ونبنى حياتنا طوبه طوبه سوا..!!أنا مش عاوز منكم حاجه..؟!ومش هأقعد هنا في البيت معاكم أنا هأروح أشتغل وأصرف على نفسى..!! أنتم محسسنى أنى مش أبنكم ..؟! وكأنكم بتنتقموا منى..!! وعاوزين تهدوا كل حاجه حلوه بتنور العتمه إللى في حياتى..!!
ضحك (مرسى أفندى) بصوت عال قائلاً:
-ها ها..ابسطى يا خديجة..!! الواد ابنك بقى شاعر..؟! طيب يا قيس يا مجنون سحر..!! أنا ماكنتش عاوز أقولك..؟!وقلت أخليك تلتفت لدروسك أحسن..!! أنا عرفت من عبده البقال..إن كتب كتاب أسم النبى حارسها يوم الخميس إللى جاى..!! علشان تبقى تصحى من أوهامك إللى أنت غرقان فيها لشوشتك وتفوق لمستقبلك..؟!

يتبع