(المشهد الثامن)&(المشهد التاسع )

نهار- داخلى (شقة سحر)

..يوم إعلان النتيجة..الأم و(سحر) يستمعان إلى أرقام الجلوس في المذياع باهتمام..وفجأة تبكى الأم قائلة:
-ياقلة بختك يا زينب في بناتك..وقسمتك السودة..واحده طفشت والتانيه ميلت بختها بأيدها..والتالته سقطت..!!
..تلتفت إلى( سحر) وهى تلطم خديها وتستطرد قائلة:
-سقطتى ليه ياختى..؟!!ناقصك أيه عن غيرك..؟!! ليه مافلحتيش زى بقية الناس..؟!! دا أبوكى هيفرّج علينا الدنيا..!! خصوصاً لما يسمع الزغاريت في بيت إلى ميتسماش..!! دا السنه إللى فاتت كان حالف ليفرق شربات على الحى كله لو جبتى مجموع أحسن من أبنه..!! تقومى تسقطى..؟!! يا شماتة العدوين فينا..!!
تصرخ فيها (سحر) والدموع تتساقط على خديها :
-ماهو كلامك ده هوا السبب..!! طول النهار والليل تقوليلى إياكى تعملى زى أخواتك..!!وأن بختك مايل ببناتك..؟! ودايما تقوليلى أنت زيك زى بقية الناس ولا فاكرة على رأسك ريشه..؟! لحد ما زهقت وطهقت..!!سيبونى بقى في حالى!!أمتى بقى أخرج من البيت ده..؟! وارتاح من الهم إللى أنا فيه!!
فجأة يدخل (عوضين) مندفعاً من الباب قائلاً:
-وكمان بتعلى صوتك يابت..!!مش كفايه الوكسه إللى أنت فيها..؟!أنت تسقطى وابن مرسى الكلب ينجح..!! أنت ماعدش ليكى مدارس خلاص ..!!أنا هأقعدك في البيت لحد ماتتنيلى وتتجوزى..يافرحتى خارجه كل يوم راحه المدرسه.. راجعة من الدرس وأدفع ياعوضين..!!والله أعلم بتروحى فين كل يوم..!! تلاقيكى طالعه لإخواتك الأتنين وملمومه على واد صايع بيضحك عليكى ومخليكى مش فايقة لدروسك..!!
وهجم عليها في ثورة وصفعها على وجهها..بينما أمها حالت بينه وبينها, محاولة تهدئته .أخذت(سحر) تبكى وقد أكفهر وجهها ,و إحمر من أثر الصفعة, ثم هرولت مسرعة وخرجت من الشقة

نهار- خارجى (سطح المنزل)

..(سحر) تجلس في أحد الأركان وهى تبكى.بينما يقترب منها (سمير) بخطوات وجلة, ويضع يده برفق على كتفها قائلاً:
-أرجوكى ماتعيطيش يا سحر..مافيش حاجه في الدنيا دى كلها تستاهل دموعك الغالية..!!
(سحر) تمسح دموعها في سرعة وتحدق فيه قائلة بانفعال :
-طبعاً..أنت مبسوط وشمتان..؟!
(سمير) في ذهول:
-أنا..؟! أنتى أزاى تتصورى حاجه زى كده..؟!
لم تلتفت (سحر) إلى إجابته وأردفت قائلة بتحدى:
-إطمن ماعدتش هتحصل تانى..!!لا يمكن أبداً..؟! أنا لازم أشق طريقى بأيدى..!! أنا عايزه أدخل الجامعة وأتخرج وأشتغل ومبقاش محتاجه لحد..؟! نفسى أنى أعيش حرة..بعيد عن الفقر والشقى والتسلط والكبت..!!
(سمير) يحاول تهدئتها قائلاً:
-أنا عارف أنك زعلانه ..وطبعاً ده من حقك..لكن ماحدش يعرف الخير فين..؟!وعسى أن تكرهوا شيئاً وهو خير لكم..
قاطعته(سحر) غاضبة:
-هيبقى الخير في السقوط أزاى..؟! آآآه طبعاً ما أنت بتدور على مصلحتك..!!مأنت نجحت..!! علشان حسبة السنين بتاعتك تتظبط..؟!
نظر إليها(سمير) معاتباً وقال:
-أنا ..؟! أبداً والله..!!أنت أزاى تظنى فيّه كده..؟!أنا عمرى ما اتمنى أى حاجه تضايقك أوتألمك..؟! أنا...
قاطعته قائلة:
-أنا خلاص ماعدش هأفكر في حد..!! مش هأفكر غير في نفسى ومستقبلى..!!
ابتسم (سمير) وقال في حنان مواسياً:
-ماهو مستقبلك هو مستقبلى..!!وإللى يفرحك يفرحنى..ونجاحى هو نجاحك..ولولاك ماكنتش نجحت السنادى..؟!أنا نجحت علشانك علشان نحقق حلمنا..!!
نظرت إليه باكية..وفجأة - قبل أن يكمل كلماته- هبطت إلى أسفل. وتركته ,الحيرة تملأ جوانحه.

يتبع