ليل- داخلى (قسم البوليس).. (مرسى أفندى) جالسا في قسم الشرطة مضمداً رأسه بشاشة كبيرة والصول يأخذ أقواله بينما (عوضين ) واقفاً والأصفاد في يديه.. متحفزا له.
(مرسى أفندى) قائلاً بصوت متهدج:
-أنا عايز الحكومة تأخدلى حقى..!! الراجل المفترى ده جه واتعدى عليا جوا بيتى..وضربنى بالكرسى في دماغى وجابلى تربنه..!! أنا لا يمكن اتنازل عن حقى ..أنا لازم أسجنه..؟!
(الشاويش) في غلظة:
-خلاص بلاش دوشه يا سيدنا..؟! لما ييجى الضابط أبقى قوله كل حاجه ..وأدينى عملتلك محضر أهوه .!!.روّح أنت ..وبكره هنعرضه على النيابه..
أنتفخت أوداج (مرسى أفندى) ونظر بشماته لـ(عوضين) قائلاً:
-أهوه دة إللى أنت تستاهله ..تبات مع إللى أنت جاى منهم يا....خرداواتى..!!
بينما (عوضين) يحاول أن يكسر القيد, يريد أن يمسك بعنقه, لكنه يفر هارباً.
(المشهد السادس)
ليل- داخلى (شقة عوضين)
..(عوضين) يجلس بجوار زوجته وهى تصب له الشاى قائلة:
-الحمد لله إنهم افرجوا عنك بكفالة..إنما أنت برضك غلطان يا أبو انتصار..أنا قلتلك تروح تتكلم معاه ..مش تفتح دماغه..؟!
(عوضين) في ضيق:
-بلاش السيره الزفت دى..!! وبلاش كمان تجيبى سيرة بنتك إللى جايبه لنا الجرسه..ومخليانى مش عارف أرفع رأسى في الحته..؟!ومقصوفة الرقبة سعاد هيا كمان ..والله لأقطع رقبتها وأكسر رجلها..ولا أقتلهم كلهم وأخلص من بلاويهم..!!وأنتى مش عاوز أسمع في يوم من الأيام أنك اتكلمتى مع الولية مرات مرسى زفت ده..!! أو تعملى مشاكل تانى معاه..أحسن وديني وأيمانى أطلقك بالتلاته..!!
فنظرت إليه (أم سحر) في خوف , وأومأت إليه برأسها, ولم تنطق حرفاً .فجأة نهض (عوضين) مسرعا إلى غرفة جانبية, وهتف صارخاً بصوت جهورى:
-بت يا سعااااااد...تعااااالى هنا..!!
خرجت ( سعاد) من الحجرة مذعورة وقالت في خوف:
-أيييوه يا بابا..؟!
فقال لها والشرر يتطاير من عينيه:
-أنتى كنتى واقفة مع الواد حسين ورا المدرسه بحق وحقيق..؟!
..لم يمهلها لتجب .لكنه أمسكها من شعرها وأنهال عليها ضرباً قائلا:
-والله لأقطع خبرك قبل ماتفضحينا فضيحة أختك..!!
صرخت (سعاد) متوسلة:
-أبدا والله ياأبا..؟! دا أحنا كنا طالعين من المدرسة كلنا مع بعض..!!
تتدخل الأم .تحاول تخليص ابنتها من قبضته قائلة:
-الله..!! وبعدين معاك ياسى عوضين..؟! هيا سعاد لسه صغيره على الضرب ..ولا لسه صغيرة على الضرب..؟! دى بقت عروسه وفاضل لها سنه وتخلص الدبلوم..!!
(عوضين) وقد استشاط غضباً:
-أيوه يازينب ماهو دلعك ده هوا اللى خلى أختها تطفش مع الواد الميكانـيكى ومانعرفش فين أراضيها..؟! قسما عظماً لو عرفت أنك وقفتى مع الواد ده مره تانيه..يا بت..!!لأكون مطلعك من المدرسة ومجوزك أحمد أبن أخويا توفيق..!!
(زينب) تقول مهدئة:
-جرى أيه ياراجل ..؟!مش تستهدى بالله وتخزى الشيطان..!!
(عوضين) ينفث بضيق:
-أستغفر الله العظيم..!! فور دمى إلاهى يفور دمه..؟! لا يمكن أبداً لسانى يخاطب لسانه ..ولا أنت تكلمى مراته طول مأنا عايش ..مفهوم..!!
ضحكت ( زينب) ضحكة خليعة مصطنعة قائلة:
-أوامرك يا سى السيد..بس روق أنت دمك..!!
(المشهد السابع)
نهار- داخلى (سلم المنزل)
(سحر)و(سمير) يجلسان نفس الجلسة على درجات السلم,بعد انقضاء عدة أعوام,ويختلسان النظر إلى باب شقتيهما خشية أن يراهما أحداً من عائليتهما.(سمير) هامساً:
-سحر يا حبيبتى أنا مابنمش الليل من كتر التفكير في مشكلتنا..؟!
(سحر) في خجل:
-قصدك أيه..؟!
(سمير) بتردد:
-يعنى قصدى موضوعنا..!!
(سحر) بدلال:
-موضوع أيه..؟!
(سمير) بنفاذ صبر صارخاً بصوت عال:
-جرالك أيه يا سحر..؟! أنتى هتعملى مش واخده بالك..زى بتوع الأفلام العربى ..وتقوليلى بصراحة أنت فاجأتني..؟!
ضحكت (سحر) قائلة:
-وطى صوتك متوديناش في داهية حد يسمعنا..!!
(سمير) بصوت خفيض:
-يعنى تفتكرى فيه حل لمشكلتنا..؟!
(سحر) بتجهم:
-بصراحه أنا مش عارفه أقولك أيه..؟! المشاكل إللى بين العيلتين بقالها سنين..ومعتقدش انها ممكن تتحل بسهولة..!!
وأنا لسه في الثانوية وأنت في سنه أولى كليه..؟!
(سمير) يمسك بيديها قائلاً في تأثر:
-سحر أنا بحبك ومقدرش استغنى عنك ..ومستعد انى أواجه العالم كله علشان خاطرك..!!
يعلو وجه (سحر) حمرة الخجل وتطأطئ برأسها قائلة:
-وأنا كمان يا سمير.. من يوم ما وعيت على الدنيا عينيا ماشفتش غيرك..وقلبى معرفش إلا أنت..!!
(سمير) في حماس:
- خلاص..أوعدينى أننا نكون لبعض مهما حصل ..وأن كان بأيدى أنط السنتين في سنه..!!
(سحر) في يأس:
-أنت لسه قدامك أربع سنين في كلية الهندسة وبصراحة أنا خايفه عليك السنادى..لأنى مش شايفاك بتذاكر..؟!
قاطعها(سمير) قائلاً:
-لا متخافيش عليا..!! أنا بأخد حبنا حافز..علشان أنجح..وأقرب المسافات بينا..ونحقق حلمنا..والمشاكل بين العيلتين مسيرها يوم تتحل..وإلا ساعتها نتجوز ونحطهم قدام الأمر الواقع..!!
(سحر) في جزع :
-لأ..!! أنا مقدرش..؟! أنت عارف إللى عملته أختى سعاد علشان تتجوز زميلها حسين..!! وإللى عمله بابا فيها..لحد مانفسيتها تعبت وحاولت الأنتحار..!!والعذاب إللى شافته لحد مااتجوزته..!! وبابا مقاطعها من يومها.. ومبيدخلهاش بيت ..ولا بتيجى عندنا..وياعينى ظروفها صعبة هى وبنتها الصغيرة..!!
(سمير) في زهو:
-أنا عن نفسى بأحييها على شجاعتها ..دى مثال للتضحية والوفاء ..وقصة حب رومانسيه يضّرب بها المثل..!!
(سحر) في استنكار:
-لأ..!! أنا مأفدرش أعمل كده..!! مش ممكن أهرب زى انتصار ولا أموت نفسى زى سعاد..!!
(سمير) في حنق:
-يعنى قصدك أيه..؟! أنت هتتنكرى ليه وتتخلى عن حبنا..؟!
أجابته( سحر) قائلة:
-أبداً..!! لكن أنا بأيدى أيه أعمله..؟! لو عايزنى آخد السنه في سنتين لحد ماتخلصش أنا ماعنديش مانع..!! لكن أخاف بابا يطلعنى من المدرسة ويجوزنى لأى حد..!!وبعدين هنعمل أيه في المشاكل إللى بين أبويا وأبوك..؟! دول ما بيكلموش بعض بقالهم يجيى عشر سنين..أزاى عايزهم يحطوا أيدهم في أيد بعض..؟!
أخذت (سحر) تبكى وأردفت قائلة:
-أنا بقفل عليا أوضتى وأقعد أعيط بالساعات..لدرجة أن ماما خدت بالها وقالتلى أنها خايفه عليا لأضيع منها زى أخواتى..!!
ثم فجأة كفكفت دموعها بيديها وصرخت قائلة بحزم:
-أنا مش عاوزه اتبهدل زيهم..؟!
قال(سمير) حزيناً:
-كده..!! دا آخر كلام عندك..؟! أنا مش هأغصب عليكى..!!ومش هأضايقك بعد كده..!! أعملى إللى أنت عاوزه تعمليه..؟! لكن كنت اتمنى أنك تكونى أقوى من كده..!! أنك تشاركينى حياتى علشان نبنى مستقبلنا.. ونحقق حلمنا إلى كنا بنحلم بيه..من وأحنا صغيرين ..؟!نحمى حبنا من كل العقبات إلى حواليه..!!مش تسيبينى لوحدى أواجه كل الصعوبات وأحل كل المشاكل ..!!وبعدين يمكن فى الأخر آجى أدور عليكى مألقاكى ..؟!
وانصرف غاضباً وتركها وحدها باكية.
موضوع: (المشهد الخامس)&(المشهد السادس)&(المشهد السابع) 
الجمعة 21 مارس 2008 - 20:47
