(المشهد الثانى)

نهار - داخلى (شقة مرسى أفندى)

..(مرسى أفندى) ينفض الغبار عن بدلته, ويجلس على الكرسى المجاور للمنضدة الموجودة بوسط الصالة, ويضع الحاجيات عليها قائلاً:
-الوليه المؤذية دى كانت هتكسر الإزاز بتاع الشراعة..طب لما أشوف جوزها هأخلى فضيحته بجلاجل..!!
تخرج زوجته (خديجه) قادمه من المطبخ وهى تحمل أطباقاً فارغة وتضعها على المنضدة قائلة:
-وأنت مالك بيها..؟!أيه خلاك تقف تتساير معاها..؟!مادام عارف أنها لسانها طويل..!!
أجابها في حنق:
-أنا إللى وقفت أكلمها..ياوليه يأم مخ تعبان..!!دا البنت مقصوفة الرقبة سحر هيا إللى وقعت البطيخة منى على الأرض..!!وكمان هما إللى فضايحهم ريحتها فاحت ..لما بنتهم الكبيرة انتصار طفشت مع الواد سعيد الميكانيّكى..ومش عارفين لها قرار..؟!وبنتها التانيه وقفالى مع الواد حسين الصايع في حته مقطوعه لحد ما هتحصل أختها..!! وأبوهم ولا على باله..؟! قاعد طول النهار يشرب جوزه على باب محل الخردوات بتاعه..!!
قالت (خديجه) في تعجب:
-طب وأنت مالك ..؟! ما تخليك في حالك..!! أحنا مش عاوزين مشاكل مع الجيران أكتر من كده..!!
تأفف (مرسى أفندى) وامتعض من كلامها ونظر حوله في الشقة وكأنه يفتش عن شئ ما و قال:
-أمال الواد سمير فين..؟!
أجابته في سرعة بتردد:
-ماعرفش..!! هوا قال أنه هيطلع يلعب بره شويه..

يتبع