يوميات زوج سعيد جداً الجــزء الثانـي عشـر

في الصباح التالي لموقعة ذات الستائر الخالدة، تحاملت على نفسي رغم الألام المبرحة وتوجهت الى عملي
وصلت مبكرا عن المعتاد ولبثت أنتظر زميلي صلاح والذي ساق الى فرصة لقاء شهرزادي الرائعة
وصل صلاح فاستقبلته مهللا مقسما عليه أن يكون إفطاره على حسابي، تقبل الدعوة شاكرا وأسرعت أنا بفتح الموضوع: ها يا أبو صلاح قل لي بالتفصيل إيه موضوع العروسة اللي عاوزه تتجوز مسيار
قال: إيه؟ الفكرة عجبتك؟
رديت: والله نشوف بس هي إيه ظروفها
قال: اللي أعرفه من الوالدة إنها دكتورة عيون، ومطلقة من سبع سنين وما بتخلفش، وهي مرتاحة ماديا ومن عيله كويسه
أنا: ما شاء الله طيب وإيه اللي خلاها تفكر في الجواز بعد الفترة دي من ساعة ما أطلقت؟
رد: هي بتقول إنها مش محتاجة لفلوس ولا بيت لان كل ده عندها هي بس نفسها في ونيس
قلت وأنا افرك يدي حماسا و جزلا والعب حاجباي: لا.. إطمن إن كان على ونيس فهي حتشوف ونيس عمرها ما حلمت بيه
قال: بس خذ بالك هي عايزه راجل محترم وما يبهدلهاش يعني عايزه حياة هادئة
قلت: ياسيدي إحنا أساس الاحترام، على البركه إن شاء الله، بس أتقدم إزاي؟
قال: سيبني أكلم الوالدة وأحدد لك ميعاد
ابتسمت وقلت: تسلم يا أبو صلاح بس أمانة ما تتأخر عليّ
رد قائلاً: ولا يهمك، و أنا أقدر أتأخر
*******
في البيت شنت حرمي المصون هجماتها اليومية المعتادة وكانت تصرخ بأعلى صوتها ولكني لم أكن أسمع سوى موسيقي سيمفونية شهرزاد و أنا أمني النفس باللقاء
سمعتها تصرخ مجلجلة: إتفضل ياسيدي العشا جاهز يلا كلوا خلصوني
نظرت إليها بعيون حالمة وقلت: لا مش حاكل أصلي شبعان
قالت: شبعان !! من إمتى إن شاء الله دا انت عمرك ما تنسى بطنك
قلت: أصلي كلت في الشغل
قاطعتني: كلت في الشغل!! آآآآآه ما احنا أصلنا بنلاقي الفلوس و
......
إستمرت تهدر كقاطرة تكتسح كل ما أمامها لكنني لم اسمع حرفا مما تقول
في اليوم التالي بشرني وجه السعد صلاح بأن والدته قد رتبت اللقاء في بيتهم غدا حيث أن العروس تقيم معها أمها فقط وليكون لقاء تعارف فإذا تم القبول أتممنا الخطوات بالتقدم رسميا
كدت أطير فرحا لدرجة إنني أحتضنت صلاح على كرهي الشديد لرائحته
أستأذنت من رئيسي مدعيا وجود ظروف طارئة واتصلت بقاطرتي و أبلغتها أنني سأتأخر لان لدي عملا خارج المكتب
إستقليت السيارة و قد وضعت خطتي لاجهز نفسي فغدا لا بد أن أكون أجمل شهريار
*******
توجهت الى صالون تجميل رجالي معروف، كنت دائما أسخر من أن يتردد رجل على صالون تجميل، ولكن لا بأس فأنا كالجميع أنتقد في العلن ما يمكن أن أفعله في السر
دخلت الى المكان متحرجا فأستقبلني شاب يرتدي قميصا أحمر يلتصق بجسده وقد عقص أسفل شعره بصورة منفرة
تحاملت على نفسي.. فكل شئ يهون من أجلك يا شهر
بادرني: آهلين أستاذ أؤمر
قلت: والله كنت عايز أعرف إيه الحاجات اللي عندكم؟
رد: كل شئ أستاذ.. قصات جديدة، صبغات ،بيرمنانت، ، حمام مغربي ،تنظيف بشرة، مانيكير وباديكير ،تدليك، إزالة شعر بالليزر
قاطعته: لا ... لا .. مش للدرجة دي أنا عايز قص شعر وتنظيف بشرة وحمام مغربي
رد بروتينية: حاضر أستاذ
قضيت ساعتين لتنظيف البشرة وقص الشعر وعمل حمام زيت وخففت شاربي ونزعت ثلاث شعرات بيضاء كانت تظهر كلها في الجانب الأيسر منه فقط لأبدو وكانني فرغت لتوي من شرب كوب من اللبن
دخلت الى الحمام المغربي وخرجت منه وانا أحس انني مخلوق جديد
مررت بمحل ملابس فخم ودفعت مبلغا مهولا لشراء بدلة فيرساتشي وقميص وربطة عنق لانفان وأزرار قميص كريستيان ديور
عرجت على محل أحذية خرجت منه حاملا حذاء كلاركس انجليزي فخم
وصلت الى منزلي الرافل في آي السعادة والهناء ودخلت مخففا الخطي على أنجو من المهالك ولكن سرعان ما انطلق المدفع الرشاش: اهلا.. اهلا.. حمدا لله على السلامة.. ما بدري
قلت: الله يسلمك
سألتني: انت فين طول اليوم عماله اكلمك على الموبايل؟
رديت بسرعة: اصلي حطيته على الصامت من ساعة الصلاه ونسيت ارجعه
(كذبة صغيرة)
سأتني بتصميم: وكنت فين ده كله
رديت: ما انا قلت لك حتأخر
بدأ صوتها في الارتفاع: تتأخر 7 ساعات؟ الساعه دلوقتي 11، وإيه اللي انت عامله في شعرك ده
قلت: إيه حلقت شعري
قالت: اول مره تحلق بالشكل ده، عاملي قصة زي ما تكون شاب صغير
قلت: وهو انا عندي 90 سنة؟ ما انا شاب صغير
ردت بتهكم: صغييييير.. طب النغّه يا ختي النغّه
(الصبر يارب)
قلت: النغه !!!! بقولك إيه انا جاي تعبان وعلي اخري
وقعت عينيها على ماأحمله: وده إيه اللي في إيدك ده؟ وريني
وهجمت على الأكياس هجمة مظفرة.. وأتسعت عيناها وهتفت: إيه كل الحاجات دي؟
رديت الرد الذي جهزته سابقاً: أصل بكره حقابل مستر لاري اليسون جاي من امريكا وده صاحب شركة كبيرة وبيدور على وكيل له هنا واحنا عايزين ناخذ الوكالة
(مجموعة أكاذيب)
قالت وعينيها تلمع بالشك: طيب وده لازم تلبسله جديد في جديدحتى الشرابات؟
قلت: لازم اكون في احسن مظهر
قالت: طيب ما انت عندك بدله جديده بقالها شهر بس
رديت: لا .. متنفعش الوانها متنفعش
نظرت اليّ وسألتني: ليه إن شاء الله
قلت وقد قررت ان انفس عن نفسي و أستفزها: طيب خلاص شاري بدله اتجوز بيها
كان هذا ما صدر منها: هئ هئ هئ هئ هيييييي يييييئ
اتغظت فسألتها: بتضحكي على إيه إن شاء الله؟
قالت: تتجااااااوز هئ هئ.. تتجوز بإيه يا حسرة روح يا خويا إتجوز واللي أخذته القرعة تاخذه ام الشعور
.......
ويحك يا امرأة قطع الله سم لسانك
تالله ما نطق لسانك صدقا سوى أنك قرعة، ولولا أني أخاف على تسريحتي لأنلتك ماتستحقين
صبراً فغداً تنالين الجزاء